Trump-a 'travel ban' hmang ṭan

US President Donald Trump-a'n Muslim tamna ram paruk aṭanga US zin luh tumte khuahkhirhna a siam chu Supreme Court-in a remtihsak hnuah hman ṭan a ni ta.

President Trump hian Muslim ram paruk - Iran, Libya, Syria, Somalia, Sudan lehYemen ram aṭanga US-a luh tumte chu ni 90 leh, raltlan luh tumte chu ni 120 chhung atan khuahkhirh a rawt a ni.

Federal court in President-in zin luh khapna a siam hi lo dan sak tawh mah se, Supreme Court chuan October thlaa hemi chungchang ngaihtuah a nih hma chuan lo hman a remti a ni. Mahse zin luh khap chungchang hi siam danglam hretin, Muslim ram paruk aṭang hian US-a chhungkhat hnai leh sumdawnna lama thawhpui neite chu an luh phalsak a ni ang.

State Department chuan Muslim ram paruk aṭanga zin tumte chuan US-ah chhungkhat hnai tak, nu leh pa, nupui/pasal, fa, makpa/mo leh unaute an neih a ngai niin a sawi. Pi leh pu, tute, ni leh pu, vahte, nupui/pasal hual tihte chu chhungkhat hnai tihah hian chhiar tel an ni lo.

Trump hian January thlaa US President atana lakluh a nih khan heng ram paruk aṭanga US-a zin tumte khuakhirhna tur hi a siam nghal a, hei hi firfiaka chetna thleng ṭhin laka invenna leh an ram himna tura ti a nih thu a sawi. Mahs federal court-in President thupek hi an lo dan sak a, March thla khan thupek hi a tichhuak leh a, hei pawh hi court-in a lo dang leh a ni.

Supreme Court-in President thupek kenkawh a remtih tak avang hian an ram huna Ningani zan dar 8 aṭang khan hman ṭan nghal a ni. Federation for American Immigration Reform thupuangtu Dave Ray chuan Supreme Court thupek hi Trump-a leh US himna ngaihventute tana hnehna niin a sawi a, America mi tina ṭhinte chu US-ah an luh theih lohna tur danna siam a ngai a ni, a ti. Hetih lai hian US-a zin khapna siam hi Middle East lam chuan an sawisel nasa hle.