Qatar-in inbiakna neih a inpeih
Qatar chuan Gulf ram dangte nena an inkar boruak ṭha lo siamṭhatna turin inbiakna neih a inpeih tih a sawi a, hemi rual hian an ram thuneihna khawih danglam thei zawnga ruahmanna erawh eng thil mah a pawm dawn lo tih a sawi.
Saudi Arabia, United Arab Emirats (UAE), Bahrain leh Egypt-te chuan Qatar ram hi firfiaka chetna thlawptu leh firfiakte sum hmanga pui ṭhinah puhin, June 5 khan an inzawmna an lo chhu chat tawh a ni. Mahse an puhna hi Qatar chuan thu dik lo niin a sawi thung.
Gulf ram pali-te hian Qatar nen an inzawmna an tihchah aṭanga kar hnih chuang hnuah, an inkar boruak siamṭha leh turin thil phut hrang hrang13 an neihte chu Qatar sorkar an hriattir tawh a, an thil phutte chhang let tur hian ni 10 chhung hun an pe bawk.
Qatar foreign minister Sheikh Mohammed bin Abdulrahman Al Thani chuan Arab ram pali-te thil phut chu pawm vek theih a ni lo a, Qatar hian duh pawh ni se a ti vek thei lo a ni, a ti. Qatar laka an thil phut zingah hian Al-Jazeera network khar te, Turkey military base khar leh Iran nen an inzawmna tihnep te a tel a ni. Mohammed bin Abdulrahman chuan ram pali-ten an thil phut hrang hrangte tihpuitling a nih hnua inbiakna neih an remti dawn chauh tih an sawi chu an buaina chinfel dan kawng ṭha nia a ngaih loh thu a sawi.