US-in Taiwan hnenah ralthuam hralh dawn

United States chuan Taiwan hnenah dollar tluklehdingawn 1.42 man ralthuam a hralh dawn.

Taiwan hnena ralthuam hralh tur hi Congress-in a pawmpui a ngai dawn a ni. Hei hi President Trump-a kaihhruai sorkar hnuaia Taiwan hnena ralthuam an hralh hmasakna tur ber tur a ni. President hlui Barack Obama hnuaiah khan kum 2015, December thla khan dollar tluklehdingawn 1.83 man ralthuam leitir a lo ni tawh bawk a, hei hian China a tilungawi lo hle.

State Department thupuangtu Heather Nauert-i chuan Congress hnenah Taiwan hnena ralthuam hralhna tur rawtna siam hi hrilh a ni tawh tih a sawi a, Congress hian a hnawl dawn a nih chuan ni 30 chhung hun a nei ang. Mahse Congress hian ralthuam hralhchhuah hi a thlawp avangin a lo pawmpui rin a ni. State Department chuan ralthuam hralh tur zingah hian high-speed anti-radiation missile, torpedo leh missile component-te a tel niin a sawi.

Taiwan hnena ralthuam hralh tur hi China chuan a duh lo hle a, US-a China ambassador chuan US leh China inzawmna ngaih pawimawh lohna leh, April thlaa President pahnih Donald Trump leh Xi Jinping-te'n Florida summit an neih tawh kalh a ni, a ti. Hetianga thil tih hi ram pahnihte inrintawnna ngaih pawimawh tawk lohnaah an ngaih thu a sawi.