Brazil-ah police officer 95 manna thupek tichhuak

Brazil thunetiute chuan Rio de Janeiro state police officer 95 manna tur thupek a tichhuak. Heng police officer-te hi ruihhlo zuartu pawlte hnena ralthuam hralh leh, police-te thuruk hrilh ṭhinah puh an ni.

Ningani khan ruihhlo tawlhruknaa inhnamhnawiha puh mi 70-te manna tur thupek tihchhuah a ni bawk a, hemi ni vek hian mi 50 man an ni a, an zinga a zahve vel chu police an ni.

Civil police investigator Fabio Barucke chuan police an mante chu mi tenawm tak, mi rethei chenna bial aṭanga ralthuam te man a, hmun danga hralh chhawng leh ching an nih thu a sawi. Hetianga mi tenawmte hi military police aṭanga paihchhuah zel tura an beih tur thu a sawi.

Brazil-ah hian military police-te chu kawtthlerah duty-in ruihhlo zuarte laka beihpui an thlak ṭhin a, a bikin Rio-a mi rethei chenna bial hrang hrangah an tam thei hle. Heng hmuna chengte hian military police-te chu eiruknaa inhnamhnawih leh, khawtual mite laka mawi lo taka che ṭhinah puhin complain an thehlut fo a ni.