Covid lakah hnehna kan chang tawh : Kim Jong Un

North Korea ram hotu, Kim Jong Un chuan an ramin Covid-19 an dona kawngah hnehna an chan tawh thu sawiin, May thlaa hri leng vanga khuahkhirhna an siamte chu hlip turin thupek a tichhuak.

Health worker leh scientist-te hmaa thu a sawinaah, Kim chuan, "Hripui leng lakah hnehna kan puang ta," tia a sawi thu state news agency KCNA chuan nimin khan a tarlang.

Kim-a farnu, Kim Yo Jong pawhin meeting-ah hian thu sawiin, an rama hri leng chu ramri kaltlanga South Korea activist-te'n ramri kaltlanga leaflet an rawn thawn aṭanga darh a nih thu a sawi. "Khauh taka kan beihlet a ngai. Ruahmanna hrang hrang kan siam a, kan beihletna tur chu a na hle ang," a ti.

NKorea hian kum 2020-a hripui len ṭan tirh aṭang khan ramri a lo khar tawh a, kumin May thla khan Omicron variant a darh tih an puan hnu lawkah khuahkhirhna khauh tak an kalpui zui a ni. July 29 aṭang khan hri kai thar an neih tawh loh thu an sawi.

Analysts ṭhenkhat chuan January thlaa NKorea-in bungrua phurh luhna tura China nena an inrinna a hawn aṭang khan an ramah hian coronovirus hi a lut niin an ring. April thlaa an ram khawpui Pyongyang-a military parade leh mipui punkhawmna lian tham tak an huaihawtah khan hri hi a darh zual ta nia ngaih a ni bawk.

Hri len thu an puan hnuah, mi makta­duai 26 cheng zinga maktaduai 4.8 te chuan khawsik an kai tih an report a, testing kit an neih ṭhat tawk loh avangin mi tlemte chauh chu Covid-19 kai an ni tih hriatchhuah an ni. Official-in an chhinchhiah danin, hri vanga thi zat chu mi 74 an ni.

World Health Organisation chuan data rintlak tak, vaccine programme leh health system ṭha an neih loh avangin NKorea-in hri kai chungchanga thuthar an puan chin chu rinhlelhawm an tih thu a sawi. Mithiam ṭhenkhat chuan hun rei tak chhung ramri an khar avanga economy lama harsatna lian tak an tawh mek karah Kim Jong Un-an thuneihna pumhlum a chan chhunzawm zel theihnan damlo leh thihpui zat thuneitu lam chuan an tidanglam niin an ngai.

South Korea-a unification ministry, NKorea nena an inkar buaipuitu chuan NKorea-in awmze nei lo taka hri leng thlen chhana a puhna leh, Kim Yong Jo ṭawngkam hawihhawm lo tak leh vauna ṭawngkam a hmangte chu ṭha lo an tih thu a sawi.

Kim Yo Jong chuan North Korea hotu Kim Jong-un pawhin khawsik a nei tih a sawi. "Khawsik sang tak a nei chung pawhin, a enkawl lai a mipuite a ngaihtuah em avangin hahchawlhna hun pawh a nei hman lo a ni," tiin hrileng kara a nuṭapa chetdan chu a fak hle.