Thailand-in an ramah Rajapaksa awm lailawk phal

Thailand chuan Sri Lanka president paihthlak tak, Gotabaya Rajapaksa chu an rama awm lailawk phalna an pe tih prime minister Prayut Chan-o-cha chuan Nilaini khan a sawi.

Rajapaksa hi a awm mekna, Singapore-a a visa chu nimin khan a tawp a, tawmhimna zawngin Thailand hi a pan leh dawn a, hei Sri Lanka a tlanchhuahsan hnuah ram pathum a panna tur a ni.

Rajapaksa hian a chenna presidential palace luhkhunga lungawi lohna lantirtuten bang tura an nawr hnuah thla hmasa khan an ram hi a tlanchhuahsan a ni. Sri Lanka a chhuahsan hnuah, July 13 khan Maldives a thleng a, Singapore pan lehin heta ṭang hian a banna lehkha a thehlut a ni.

Thailand PM chuan mihring inlainatna lantirna atan an rama Rajapaksa awm lailawk phalna chu an pe tih a sawi a, "Awm lailawk chauh kan tiam a ni. Politics thil a inrawlh kan rem ti lo a, tawmhimna tur ram dang a zawn theih phah dawn a ni," a ti.

Thailand foreign minister Don Pramudwinai chuan Rajapaksa chu diplomatic passport kawllai anih avangin Thailand-ah ni 90 chhung a chen an phalsak tih a sawi bawk.

Don chuan president Ranil Wickremesinghe kaihhruai Sri Lanka sorkar chuan Rajapaksa-in Thailand-a tlawh hi an ngaimawh loh thu an sawi. Mahse, President hlui hi amaha a chenna hmun tur inzawnchawp tura tiin, Thai sorkar chuan ruahmanna hranpa siamsak an tum loh thu a sawi.

Thai foreign minister chuan Rajapaksa chu a awm chhung chu intiamkamna pakhat an neihtir a, chu chu Thailand tana harsatna siam loh a ni, a ti.