Afghan-a central bank fund pechhuak turin Biden ngen

Khawvel hmun hrang hranga economist leh expert 70 chuangte chuan, US leh ram­dangte chu Afghanistan-a central bank asset an hrek mekte pe kir tura ngenna lehkha chu Nilaini khan U.S. president Joe Biden hnenah an thawn.

President Biden-a hnena lehkha an thawnah hian, Afghan central bank asset-a foreign capital USD tluklehdingawn kua chu Da Afghanistan Bank (DAB) hnenah pe kir turin an ngen a, Taliban-in hmeichhia leh pawl tlem zawkte chunga an khawsakdan avanga sawiselna awm ṭhin mah se an economy hreksak lo turin an ngen a ni.

"Afghan mite chu an duh ni miah lo sorkar an hrawn avangin an tuar nawn tir a ni," tiin mipui harsatna sukiang tur leh Afghan economy-in ṭhat lam a pan zel theihnan, DAB chu international reserves pe kir turin an ngen tih an sawi.

U.S. Treasury Secretary Janet Yellen pawh lehkha hi thawnin, economist leh academic expert 71-in an hming an ziak a, heng zinga a tam zawkte chu United States bakah Germany, India leh United Kingdom ami te an ni. Greece finance minister Yanis Varoufakis leh Columbia University professor, kum 2001-a Nobel Prize in economics lo dawng tawh Stiglitz-te pawh hming ziak zingah hian an tel.

Afghanistan-a Taliban-in thuneihna an chan hnuah economy lamah an talbuai nghal a ni. Ram dangten chhawm­dawlna an pek ṭhinte an tihtawp avang te, Ukraine-a indona thleng mek avanga thil man sang zelte chuan an buaina hi a tizual bawk. Hetih lai hian an talbuaina bulpui ber chu central bank-te'n an thil neih khawih thei loa hrek an nih vang niin economist-te chuan an sawi a ni.

Afghan pawisa hlutna chu a tlahniam nghal hle a, an bungraw lakluh man a san phah a, ram mipuiin bank-a an khawlsa leh hlawhte an lakchhuah theih loh avangin banking system pawh a tluchhe teuh hle a ni.