Iraq sipaiten Mosul-ah IS-te hual vek tawh

Iraq sipaiten Islamic State (IS) firfiak kut aṭanga an ram khawpui lian pahnihna, Mosul laklet tumin beihpui an thlak chhunzawm zel a, khawpui chhunga IS awmte chu an hual vek tawh nia tarlan a ni.

Federal police unit-te chuan kar kalta Inrinni khan Tigris River lei chu firfiakte kut aṭangin an la tawh bawk a, IS hote tlanchhiatna tur awmchhun chu an dan sak tawh a ni.

US thlawpna hnuaiah Iraq sipaite chuan Old City-a hmun tam tak chu an la let tawh bawk a ni.

Iraq joint forces thupuangtu, Yahia Rasoul chuan IS-te hian Mosul khawpui chhunga chenna bial tlemte chauh a thunun tawh a, he hmun hi sipaiten lak tumin an bei zui leh mek a, hma pawh an sawn zel tih a sawi. IS laka hnehna an chan thu hi an puang thei thuai dawn tih a sawi bawk.

Sipaite hian kar hmasa khan Mosul-a hmun hmingthang, al-Nuri Mosque chu firfiakte kut aṭangin an la tawh bawk a, IS hian Mosul an lak hnuah al-Nuri Mosque hi an bomb chhia a, he mosque leh firfiakten hmun pawimawh dang an tihchhiatte chu din thar leh a ni dawn tih, Prime Minister Haider al-Abadi chuan a sawi.

UN chuan IS-te’n an la awp bial chhunga civil mi chengte chuan ei tur leh tui thianghlim an tlachham ṭan niin a sawi a, mahse IS hian sipaite laka inphenna atan civil mite hi an hman avangin an tlanchhuah an phal lo niin a tarlang.