Qatar-in pawm theih loh thil phut siamah puh

Qatar chuan Arab ram pali - Saudi Arabia, UAE, Bahrain leh Egypt-te’n an inzawmna an chhut chat tawh siamṭhat lehna tura thil phut an siamte chu pawm theih loh tur, hnawl tur saa an duan a ni, a ti.

Arab ram pali-te hian thla khat dawn Qatar nena an inzawmna an tihtawp tawh siamṭhat a nih leh theih nan Qatar hnenah an thil phut 13 an pe a ni. June 22 khan Qatar hnenah thlenin, an thil phut tihlawhtling tur hian ni 10 hun an pe a, an huntiam hi nimin khan a tawp a ni.

Qatar Foreign Minister Sheikh Mohammed bin Abdulrahman Al-Thani chuan, tupawhin an thil phut hi Qatar ram thuneihna palzut tumna a ni tih an hre thei vek a ni, a ti. Hemi rual hian inbiakna nei turin Qatar ram chu a inhawng reng tih a sawi. Mahse Arab ram pali-te hian an thil phut an tarlan tawhte chu sawiṭhat theih a nih loh thu leh, hei hi pawm a nih loh chuan Qatar hrekna na zawk kalpui a nih tur thu a sawi.

Arab ram pali-te’n an thil phut zingah hian Qatar ramchhunga Turkey military base khar te, al-Jazeera network kharte a tel. UN Human Rights Council pawhin ram pali-te’n al-Jazeera television channel khar tura an phut chu a dem thu a sawi a, hei hi inhrekbeh tumna anga an ngaih thu a sawi.