Qatar hnenah darkar 48 hun pek belh

Arab ram pali - Saudi Arabia, UAE, Egypt leh Bahrain-te’n Qatar hnena an thil phut 13 an pekte tihhlawhtlin nana ni 10 hun an pek chu huntiam a ral hnuah, nimin khan darkar 48 chhung hun an pek belh leh.

Qatar hi firfiaka chetna thlawp leh, firfiakte sum hmanga pui ṭhinah puhin Arab ram dang pali-te hian an inzawmna an lo chhu chat tawh a, Qatar nena an inkalpawhnate pawh an khar a ni. Hemi hnu hian an inkar boruak siamṭha a, inbiakna nei tura nawr an nih hnuah inbiakna nei tur chuan Qatar hnenah hian thil 13 an phut a, hei hi hriattirin tihlawhtling turin ni 10 hun an pe zui a, an hun tiam hi Pathianni khan a zo a ni.

Mahse Qatar chuan ram palite thil phut hi hnawl tur saa siam nia sawiin a pawm theih loh tur thu a lo sawi tawh a, an ram thuneihna laka inrawlh tumna angah a ngai a ni. An ram an puhna hrang hrangte chu thu dik lo niin a sawi bawk. Hemi rual hian ram dang pali-te nena an inkar boruak siamṭhat dan kawng zawnga inbiakna nei tur chuan a inpeih tih a sawi.

Ram pali-te’n Qatar an hrek avang hian Qatar mipui, mi maktaduai 2.7-te chuan nitin khawsakna atana mamawh lakkhawm kawngah harsatna an tawk ṭan a, an harsatna phuhruk nan hian Turkey leh Iran chuan ei tur leh mamawh dang an supply ṭhin pawh an tipung tawh a ni.