Indonesia-ah Rescue helicopter a chesual
Indonesia-a Java thliarkara tlangkang vanga harsatna tawkte chhanchhuahna atana hman, rescue helicopter chu Butak Mountain-ah a tla a, mi pariat an thi.
Pathianni khan Central Java-a Dieng Plateau-ah tlang kang tur a invawrh chhuak a, hei vang hian helai hmuna awmte chu thiarchhuah an ni. Mipuite thiarchhuah hna thawh nan hian Indonesia siam, Dauphin AS365 helicopter hman a ni a, nimin zing khan a chesual ta a ni.
National Search and Rescue Agency director Ivan Tito chuan helicopter chesuala thi ruangte hi Central Java khawpui, Semaranga-a Police Bhayangkara Hospital-ah lak an nih thu a sawi. Helicopter-ah hian thawktu pali, navy officer vek leh an mi chhanchhuah palite an chuang niin a sawi.
National Disaster Mitigation Agency thupuangtu, Sutopo Purwo Nugroho chuan Pathianni khan Dieng Plateau-a Sileri Crater aṭangin vut leh chirh te chu rawn invawrh chhuakin, meter 50 vela sangah te a rawn vawrh chhuak niin a sawi. He thil thlen lai hian tlawhtu mi 17 vel an awm a, an zinga mi 10 chuan hliam an tuar a, damdawi-in panpui nghal an ni. Police leh sipai officer-te tirh nghal niin, helai biala chengte chu tlangkang nasa zawk a thlen palh hlauhthawn avangin insawnchhuak tura hriattir an ni.