Egypt-in mi 20 te thi tura hremna pe

Egypt court chuan kum 2013-a police station bei a, police eng emaw zat thah an nih thubuaiah Pathianni khan mi 20-te chu thiam loh chantirin, thi tura hremna a pe.

Cairo Criminal Court-in thi tura hremna a pek hi appeal theih a la ni ang.

Kum 2013 August thlaa police station beih hi ‘Kerdasa massacre’ tia sawi a ni. Hel eng emaw zat chuan Cairo bul, Giza province-a Kerdasa district police station pui ber chu luhkhungin an bei a, mi 17 an that a, an zingah hian police 14 an tel.

Police station beitu zing­a a tam zawk hi tuna dan pawna hnawl tak, President hlui Mohamed Morsi-a party, Muslim Brotherhood thlawptute an ni. Morsi hi sipai chakna hmangin kum 2013 July 3 khan paihthlak a ni a, paihthlak a nih hnu hian amah thlawptu leh police leh sipaite inkarah buaina a chhuak zui fo a, Cairo leh Giza-ah Morsi-a thlawptuten nawrh an huaihawt chu security force-te’n beiin, mi za tel an thih bakah mi sang chuang man an ni bawk. Egypt thuneitute chuan buaina chhuak leh sorkar lam beihna thleng ṭhinah Muslim Brotherhood chu mawhphurtuah puhin dan pawnah a hnawtchhuak zui a ni.

Morsi bakah Muslim Brotherhood hruaitu tam zawkte chu jail-ah an tang mek a, an zinga eng emaw zat chu thi tura hremna leh damchhung tang tura hremna pek an ni tawh. Morsi pawh hi amah thlawptu leh eptute inkara buaina chhuakah mawhphurtuah puhin kum 20 tang tura hrem a lo ni tawh bawk.