SKorea-ah Ram chhung aṭanga hri kai thar awm lo

South Korea-ah chuan nimin khan ram chhung aṭanga Covid-19 kai thar an awm lo a, Febuary thlaa an rama hri kai hmuh hmasak ber a nih aṭanga hri kai thar an awm loh ni hmasa ber a ni. 

Korea Centres for Disease Control and Pre­vention (KCDC) chuan ram chhung aṭanga he hri kai thar hi an awm loh rualin, ramdang aṭanga lutte aṭangin hri kai hi hmuh an la awm reng tih a sawi. Ram dang aṭang lut, hri kai hmuh tawh hi mi 10,65 an awm a, an zinga 90% chu Korean an ni. 

Khawvel ram pumah nimin thleng khan hri kai hi maktaduai 3.1 an awm tawh a, mi 224,600 in an thihpui tawh a, hri kai enkawl dam 957,000 an awm tawh bawk. 

Hri kai tamna ber ram, US-ah chuan hri kai hi nimin thleng kha chuan mi 1,064,572 an awm tawh a, heng zinga mi 147,411-te chu enkawl dam tawh niin, mi 61,669-in hri hi an thihpui tawh a ni.

Japan prime minister Shinzo Abe chuan hri leng vanga April 7-a an rama bial pasariha emer­gency a puan chu pawhsei a ṭul leh ṭul loh chungchangah damdawi lama mithiamte a rawn dawn tih a sawi. Hemi rual hian emergency hi a pawhsei ngei rin a ni. 

Emergency puan hi May 6 hian a tawp dawn a, mahse thla khat dang an pawhsei leh rin a ni. Japan ramah hian lockdown puan hran a ni lo a, mahse emergency puan hmang hian governor-te chu mipui pawnchhuah khap leh sumdawnna hmunte khartir turin thuneihna pek an ni thung. 

Japan ramah hian Covid-19 kai hi 14,000 an chuang tawh a, mi 436 in an thihpui tawh bawk. Hri kai zinga 4,000 chuang hi Tokyo-a cheng an ni.

Pakistan ramah chuan Nilaini khan ni khata hri kai thar an tam ber ṭum niin, hemi ni hian mi 874 in hri hi an kai thar a ni. 

Pakistan-a hri kai awm zat hi  15,759 an tling tawh a, an zinga 4,052 chu enkawl dam tawh niin mi 346 in an thihpui tawh. 

Germany Chancellor Angela Merkel chuan hri darh tur venna atana midang nena inhlata awmna dan siam, social distancing rule hman mek chu May 10 thleng hman chhunzawm a ni dawn tih a sawi. 

Germany rama lockdown kalpui mek chu thlah dul ṭan a ni tawh a, dawr ṭhenkhat pawh inhawn phalsak an ni tawh. Mahse zin khapna erawh chu June 14 thleng a pawtsei thung.