US official ten Kim Jong-un chanchin hre lo : US secretary of state
United States secretary of state Mike Pompeo chuan US official-ten North Korea leader Kim Jong-un chu tunhnaia an hmuh loh thu leh a chanchin hriat an neih rih loh thu a sawi.
Fox News-in an kawmnaah, Pompeo chuan Kim hi a awmna chin an hriat rih loh thu a sawi a, a hriselna a ṭha em tih chu an ngaihven reng thu a sawi bawk. Pompeo chuan khawvelah Coivd-19 hri leng vangin ram hrang hrang ten hun harsa an tawh mek thu sawiin, hri leng vangin North Korea-ah hian mipuiten ei tur khawpkham nei loa an ṭam mai a hlauhthawnawm thu a sawi bawk.
Eng dinhmunah nge North Korea hi a din mek tih hriat chian a nih loh avangin Pompeo chuan North Korea chanchin chu ngaihven reng a nih thu a sawi. Kum 1990 chho khan Nkorea-ah hian ṭam a tla tawh a, kha thil thlengah khan mi 100 chuang an thi a ni.
Hri leng vangin January 23 aṭang khan NKorea hian a ramri te chu a khar nghal vek a, January 30 khan state emergency puan a ni. Hri kai nia rinhlelh te chu Sinuiju khuaah khung hranna siam a ni bawk. North Korea-ah hian an ramah Covid-19 kai an la awm lo tih an sawi a, mahse hei hi khawvel chuan a awihpui lo hle thung.
April 15-a North Korea hnampa piancham lawmnaah Kim hi a kal lo niin media-te chuan an sawi a, kum tinin he lawmna neihah hian Kim hi a kal ziah a, mahse he hunah hian kuminah a hmel hmuh a nih tak loh avangin a chanchin hian ngaihven zui a hlawh hle a ni.
Vantlang hmaa Kim a inlan hnuhnung ber nia sawi chu April 11-a Workers' Party politburo meeting an neihnaah khan a ni a, kar hnih chuang vantlang hmuhah a inlan tawh loh avang hian Kim hi a thi ta niin miṭhenkhat chuan an ngai.
Inrinni liam ta khan US based NKorea monitoring project, 38 North hmanga satellite image-in Kim hi North Korea chhim chhak South Korea nena inrina Kangwon Province-a Wonsan khuaa tourist resort-ah a awm nia tarlan a ni. April 13 aṭang khan he hmunah hian a awm nia sawi a ni bawk.
Kim chungchangah hian North Korea hi a ngawi a, hei vang hian a chanchin dik ta hriat a ni lo. Media hrang hrangin ngaihven hle mah se, rinthu mai bak chu sawi tur a awm rih lo.