North Korea-in missile enchhin leh

North Korea chuan nimin khan intermediate range missile a enchhin leh niin, US military official-te chuan an sawi.

Land-based missile hi Panghyon airfield aṭanga kachhuah a ni a, minute 37 vel a thlawh hnuah Sea of Japan-ah a tla niin US Pacific Command chuan a tarlang. Japan chuan he thil hi a duh loh thu a sawichhuak nghal a, Prime Minister Shinzo Abe chuan NKorea chu a ṭhenawm ram dangte himna tiderthawng zawngin a che chhunzawm zel tih chiang takin a lang a ni, a ti.

UN-in ballistic missile leh technology lam enchhin a khap chung leh, ram dangten enchhin tawh lo tura an nawr reng chungin North Korea hian nuclear leh missile test a nei chhunzawm reng a, nimina a missile enchhin hi kumin a enchhin ṭum 11-na tur a ni.

South Korea chuan nimina NKorea-in missile a kahchhuah hun hi an ram huna zing dar 9/40 a nih thu leh, km 930-a thui a thlawh thu a sawi. US chuan NKorea missile enchhin thar hi an ram tan a hlauhawm pha lo tih a sawi bawk.

Japan Chief Cabnet Secretary Yoshihide Suga chuan NKorea-in an ram hrekna a palzut reng chu ngaihzam mai chi a ni lo tih a sawi a, US leh South Korea nen NKorea chu missile leh nuclear test nei chhunzawm tawh lo turin an na takin an nawr chhunzawm zel dawn tih a sawi. NKorea nawrna kawngah China President Xi Jinping leh Russia Prseident Vladimir Putin-te pawh na zawka che tura ngen turin biak a tum tih a sawi.