Bangladesh-a factory-a chhiatna thlengah mi pariat an thi

Bangladesh khawpui, Dhaka khawdaia thawmhnaw siamna factory chu nimin khan puakin building a chim zui a, mi pariat an thi a, mi dang 50 chuangin hliam an tuar.

Police officer Harunur Rashid chuan chhiatna thlenna hmunah hian fire brigade officer-te thlengin chhanchhuah hna an thawh thu a sawi. Rashid chuan factory boiler a puak tih a sawi a, he thil puak hian building chhawng ruka sanga bang leh inchungte a tichim niin a sawi. He thil thlen lai hian factory-ah hnathawktu mi eng emaw zat an awm a, thil puahna hmunah hian ruang paruk hmuh nghal niin midang pahnih chu hospital-ah ah hliam tuar loin an thi tih a sawi. Thi zingah hian thil puah laia factory pawn lama kea kalte pawh an tel niin a sawi.

Hliam tuarte hi damdawi-in hrang hrangah enkawl an ni a, an zingah ṭhenkhat chu an dinhmun a ṭha lo hle. Factory hi textile manufacturer Multifabs ta a ni a, he factory-ah hian Europe rama thawn tur thawmhnaw an siam ṭhin.

Bangladesh-ah hian thawmhnaw siamna factory a tam hle a, mahse factory tam zawk hian safety standard an zawm ṭha tawk lo a, building-ah pawh ventilation leh air cooler-te dah mumal a ni lo. Supreme Court chuan safety standard zawm ṭha lo thawmhnaw siamna factory 4,500 chuang chu khar turin thupek pawh a lo tichhuak tawh a ni.

Kum 2013 April thla khan Rana Plaza factory complex, chhawng kua-a sang chu a chim a, mi 1,100 chuan an thi a, industry-a chhiatna thleng rapthlak ber zingah a tel a ni.