China rama tuilianah mi 50 chuang thi

China chhim lama ruah­sur nasa avanga tuilianah mi 56 vel an thi tawh a, chin hriat lohin mi 22 an awm mek. Tuilian avang hian power line-te a chhia a, chenna in tam tak a chhe tel bawk.

Lui 60 chuang chuan hlauhawm chhinchhiahna an pel vek a, mi maktaduai 1.2 vel chu hmun him lama insaseng tura hriattir an ni.

Thuneitute chuan tuilian avang hian in 38,000 vel a chhia a, thlai chinna ram hectare 880,000 vela zau pawh a chim chhe tel niin an sawi.

China sorkar chuan tuilian tuarte chhawmdawlna tur hian dollar maktaduai 103 a pe a ni. China chhim lam leh ram laili bialte hian kumtinin tuilian hi an tuar a, mahse kuminah hian kum dang zawng aiin a nasa a ni.

Huna province hmun hrang hrangah tuilian avang hian mi tam tak sawnchhuah an ni a, tuilian avanga he province-in a thil hloh hlut zawng hi dollar tluklehdingawn 1.22 vel a tling niin, provincial civil affairs office chuan a tarlang. Province khawpui, Changsha-a khualzinte tlawh ṭhin hmun lar tak, Orange Isle pawh tuilian hian a chim pil tep tawh a ni.

State Flood Control and Drought Relief Headquarters chuan June thla laihawl aṭang khan ruah nasa takin a sur a, hei vang hian Yangzte lui leh a peng 10-te chu an lian vek niin a sawi.