Maduro thlawptuten National Assembly luhkhung

Venezuela President Nicolas Maduro-a thlawptu mi 100 velin Nilaini khan eptu lam rorelna, National Assembly an luh­khung a, roreltu mi ṭhenkhatte kut an thlak.

National Assembly-ah hian an ram Independence Day pualin session neih a ni a, session neih laiin sorkar thlawptu lamte hian an luhkhung zui a ni. Building vengtu military police-te chu mipuite hian tiang leh pipe hmanga beiin, gate-ah an lut tlang a ni. Sorkar chuan he thil thleng chungchang hi chhui chian a tiam.

Assembly speaker chuan mi 350 vel chu building chhungah hun eng emaw chen hren an ni thu a sawi a, an hren zingah hian journalist pawh 108 vel an tel niin a sawi. Journalist pasarih leh assembly staff pahnihte chu hliam tuar zingah an tel nia sawi a awm bawk.

Venezuela newspaer Tal Cual chuan Assembly building luhkhungtute chu helpawl, ‘colectivos’ niin a sawi a, building chhung an luh theih nan hian rocket-te an kap niin a sawi.

Assembly beih a nih lai hian President Maduro chuan khawpui chhung hmun danga sorkar ruahmana Indepen­dence Day military parade neihnaah thu a sawi a ni.

National Assembly session neih lai hian pawn lamah sorkar thlawptu mi eng emaw zat chuan kawng an zawh a, Vice President Tareck El Aissami-a’n thu a sawi. President thlawptute chu an thlawpna lantira legislature-a kal tura a tih hnuah pawn lama mipui awmte hian building hi an luhkhung ta a ni. Kum 2015-a inthlan neihah khan National Assembly-ah hian eptu pawl lam an chak a, eptu lam rorelna a nih avangin president policy pawh an sawisel fo a ni. Maduro chuan eptute chu a kaihhruai sorkar dan kalha paihthlak tumah a puh.