Duterte-a’n firfiakte an lu tansak leh an sa eiah a vau

Philippines President Rodrigo Duterte chuan firfiakten Vietnam sailor pahnih ruboa an lu an tansak avangin he thila inhnamhnawih firfiakte chu an lu tansak a, an thin eisakah a vau.

Nikum November thla khan Vietnam bungraw phur lawnga thawk mi paruk chu rukbo an ni a, an zinga pakhat chu thla hmasa khan chhanchhuah a ni. Rukbo zinga mi pa­hnih ruang chu Nilaini khan Philippines sipaiten Min­danao bialah an hmu a ni.

Sipaite chuan lawnga thawkte rukbona leh thahnaa mawhphurtuah Abu Sayyaf group an puh a, Mindanao khuaah sipaite nena inbei mek a ni. Abu Sayyaf-te hian a hma pawhin an mi hrente chu a tlan chhuahna sum an phut pek an nih loh chuan an lu an lo tansak fo tawh a ni.

Ruang pahnih hmuh a nih hnua thu a sawinaah, President Duterte chuan, “In duh a nih chuan in thin kha ka ei mai ang. Chi leh vinegar min pe ula, in hmaah ka lo ei ang” tiin firfiakte a vau. Firfiakte kut tuara thi Vietnamese sailor pahnih­te thlalak pawh a tilang bawk a ni.

Kum 72 mi, Duterte hian nikum khan an ram chhim lamah Abbu Sayyaf leh firfiak pawl dang lakah sipaite chu beihpui a lo thlak tir tawh a ni. Beihpui thlaknaah hian US chuan Philippines sipaite hi a pui a, inbeihna thlengah hian mi 400 chuangin nunna an chan tawh a, mi nuai li vel chu an tlanchhe tawh bawk.