Libya commander-in firfiakte lak aṭangin Benghazi chhuah zalen

Libya rama self-styled Libyan National Army (LNA) chuan an ram khawchhak lama khawpui, Benghazi chu hun rei tak Islamist firfiakte nen an inbeih hnuin firfiakte lak aṭangin a zalen ta niin a sawi.

LNA commander Field Marshal Khalif Haftar chuan Benghazi khawpui chuan bung thar a kai a, khawpui chhungah himna, remna leh inpumkhatna a awm tawh a ni, a ti. Haftar Libya hruai­tu hlui, Muammar Gaddafi hnuaia commander ṭhin a ni a, mahse UN thlawp Libya sorkar chuan LNA hi a pawm lo thung.

Kum 2011-a Gaddafi paihthlak a nih aṭang khan Libya ramah hian tual­chhung buaina a la thleng reng a, firfiak pawl hrang hrang an che reng a, an zingah Islamic State (IS) pawh an tel. Field Marshal Haftar chuan Nilaini khan TV-ah thu sawiin, kum thum chuang firfiakte nena an inbeih hnuah, Benghazi khawpui chu a zalen ta tih a sawi. Kar kalta khan Benghazi-a Sabri district-ah LNA fighter leh Islam firfiakte hi an inkap nasa hle a, mi tam tak an thi a ni. Haftar-a pawlte hian firfiak an beih letna kawngah ramdang puihna pawh an dawng ṭhin a ni.