NKorea missile : US-in a ṭul chuan sipai chakna hman hreh lo

United Nations-a US Ambassador Nikki Haley-i chuan North Korea-in missile a enchhin leh chu a dem thu sawiin, US chu a ram leh a thawhpui ramte venghim turin a inbuatsaih a ni, a ti.

Thawhlehni khan North Korea hian long-range missile a enchhin leh a, hei hi NKorea ṭhenawm ram leh US chuan na takin an sawisel a, Nilaini khan UN Security Council pawhin US ngenna angin NKorea chungchang ngaihtuahin meeting a ko a ni.

Nikki Haley chuan US chuan a ṭul a nih chuan NKorea lakah sipai chakna a hmang mai dawn tih a sawi a, NKorea hrekna dang siam tur chu UN-ah pharh tum a nih thu a sawi bawk.

Hetih lai hian NKorea chuan US-in an ram a hrekna leh a enhranna chu a tihtawp phawt loh chuan nuclear leh missile programme a siam chungchangah inbiakna a neihpui dawn lo tih a sawi. Thawhlehni-a a missile enchhin pawh an ram hotu lu ber, Kim Jong-un pawhin a enpui a, he missile enchhin hi Nilaini-a Independence Day lawmtu, America mipuite tana an thilpek niin a sawi.

NKorea chuan missile a enchhin hnuhnung ber hi Hwasong-13 ICBM a nih thu sawiin, km 2,802-a thui kap pha a ni tih a sawi. Missile hi kahchhuah a nih hnuah bo­ruakah minute 39 vel a thlawk a, km 933-a thui a thlawh hnuah tuipuia a target chu a fuh niin a sawi bawk.