Mexico tan-ina inbeihnaah mi 28 thi
Mexico rama Acapulco tan-in chhunga pawl pahnihte inkara inbeihna thlengah mi 28 an thi a, mi dang tam takin hliam an tuar.
Ningani khan tan-in chhungah hian buaina a chhuak a, buaina chhuaka thi zinga ṭhenkhat chu an lu tansak an ni a, ṭhenkhat chu an taksa chan sawm sak an ni bawk.
Mexican Pacific resort, Acapulco-a tan-in hi venhimna khauh taka hnuaia dah ni mah se, tan-in choka, a tualzawl leh tang tlawhtute awmna munah buaina hi a chhuak niin Guerrero state security thupuangtu, Roberto Alvarez chuan a sawi.
State police-te chuan tan-ina buaina hi an thunun thei tawh a, venhim hna thawhna kawngah federal police leh sipaiten an pui a ni. State governor chuan tan-ina buaina chhuak chungchang hi chhuichiang turin thupek a tichhuak nghal a, prison staff-te pawh chhui chiang tura tih a ni.
Acapulco-ah hian ruihhlo tawlhru pawlte inkarah buaina a chhuak fo a, Guerrero state-a khawpui lian ber niin, Mexico ram chhunga dan leh thupek kenkawh ṭhat lohna ber state a ni.