France-in emergency pawt sei leh

France chuan a ṭum rukna tan an rama emergency puan mek chu a pawhsei leh.

France Parliament member thlan tharte chuan an rama emergency pawhsei chung­changah vote an thlak a, member 137 chuan pawhsei hi remtiin member 13 in an duh lo. Emergency puan hi November thla thleng atan pawhsei ani ta a ni.

Kum 2015 November thlaa firfiakte France khawpui, Paris an beih vanga mi 130 thihna a thlen hnu khan state of emergency hi puan a ni. Emergency hnuaiah hian security force-te chuan an mi rinhlelhte dap leh enthlak kawngah zalenna leh thuneihna sang zawk an nei thei a ni.

Interior Minister Gerald Collommb chuan France mipuite himna chu an ngai pawimawh tih sawiin, kumin chhung pawhin pawikhawihna thlen tum ṭum sarih an dang tawh niin a sawi.

May thlaa inthlana France President atana thlan thar, Emmanuel Macron chuan state of emergency puan chu kumin November thlaah tihtawp a tiam a, mahse hemi hnuah hian security law ṭha leh ngelnghet zawk siam an tum tih a sawi.

Human rights group hrang hrang chuan France rama emergency puan hi tihtawp turin an ngen a, an zingah hian Amnesty International leh Human Rights Watch pawh an tel.

France sorkar hian kum 2014 aṭangin an ram chhungah petrol leh diesel hmang motor hralhchhuah khap a tum bawk. Ecology minister Nicolas Hulot chuan kum 2050-ah an ram chu carbon khu lak aṭanga fihlim tir an tum tih a sawi. Kumin kum chanve hmalama France rama motor awm thar zinga 95.2% chu diesel leh petrol hmang a ni a, electric motor chu 1.2% chauh a la ni. Mahse sorkar chuan ruahmanna siamin, fossil fuel hmang motor tihtawp tum hian ruahmanna kalpui a ni dawn tih a sawi. Hei bakah hian kum 2022-ah coal power plant tihtawp a, nuclear power pawh 50% a tihhniam a tum bawk.