G20 summit neihna nawrh huaihawt

Germany-a Hamburg khuaah Ningani leh nimin khan G20 summit neih a ni a, hetihlai hian G20 summit duh loa nawrh huaihawtte buaina siam avangin police tam takin hliam an tuar.

Summit neihna tur hmun bulah mi eng emaw zatin lungawi lohna lantirin kawng an zawh a, mipui pungkhawmte hnawtdarh nan hian police-te chuan water cannon leh pepper spray-te an hmang a ni. Pungkhawm zinga ṭhenkhat chuan bur ruak leh hmanraw dang hmangin police-te hian lo bei let a ni.

G20 summit-ah hian US President Donald Trump, Russian President Vladimir Putin leh Turkey President Recep Tayyip Erdogan te pawh an tel a, a thlengtu Germay Chancellor Angela Merkel chuan ram hruaitute hian financial market, firfiaka chetna thleng ṭhin do let dan leh, khawvel sik leh sa danglam chak chung­changte an sawiho zingah a tel tih a sawi. Hei bakah hian zalen leh awmze nei taka insumdawn tawnna chungchang pawh an thu ngaihtuah pawimawh zingah a tel thu a sawi.

Tun ṭum hi US President atana Donald Trump lakluh a nih hnua Russia President Vladimir Putin nena hmaichhana an inhmuh ṭum khatna a ni. Hruaitu pahnihte hian nimin khan meeting an nei nghal a ni.

G20, Group of Twenty hi developed leh developing country 19 leh European Union (EU) awmna a ni. EU bakah Argentina, Australia, Brazil, Canada, China, France, Germany, India, Indonesia, Italy, Japan, Mexico, Russia, Saudi Arabia, South Africa, South Korea, Turkey, UK leh US ram an tel a ni.