Arab ram pali-ten Qatar hrekna thar siam tum

Arab ram pali - Saudi Arabia, United Arab Emirates, Bahrain leh Egypt-te chuan Qatar ramin an thil phutte a tihhlawhtlin loh avangin hrekna thar siam an tum tih an sawi.

Ram pali-te hian Qatar hi firfiakte thlawp leh sum hmanga ṭanpuiṭhinah puhin an inzawmna an chhu chat tawh a, an inkalpawhnate pawh an khar a ni. Hemi hnu hian an inkar boruak siamṭhat dan zawnga inbiakna an neih theih nan Qatar ram hnenah an thil phut 13 an hriattir a, hemi tihlawhtling tur hian hun an pe zui bawk.

Qatar hian Arab ram pali-te thil phut chu tihhlawhtlin theih loh tur tih chiang sa, hnawl ngei tur a ni tih pawh a tiraṭangin a chiang nghal niin a sawi. An thil phut hi a tihlawhtling vek thei lo a, hemi rual hian inbiak­na neihpui tur chuan a inhawng reng tih a sawi.

Ram pali-te chuan thuchhuah siamin, Qatar-in an thil phutte a ngaih pawimawh loh avangin hrekna thar an siam dawn tih an sawi a, mahse eng huna hman ṭan tur nge tih erawh an sawilang lo. Qatar hrekna thar siam an tum chu a ram mipuite lakah ni loin, Qatar sorkar lakah a ni dawn tih an sawi bawk.