Taliban-ten Kabul-a hmeichhe kawngzawhte kut an thlak

Afghanistan khawpui, Kabul-ah Inrinni liam ta khan hmeichhe ṭhenkhat chuan hmeichhiate zalenna pek phutin kawng an zawh a, kawngzawh hi Taliban sipaite chuan hnawtdarhin kut an thlak a, van lam hawiin silaite an hmetpuak bawk.

Kabul-a education ministry bula hmeichhe kawngzawh hi 40vel an ni a, hnathawh leh zalenna an duh thute an aupui a ni. Taiban sipaite chuan awmkhawmte hi hnawtdarhin an tlanchhia chu an umzui a, an silai kawmten an vaw zui a ni. Kawngzawh huaihawttu zinga mi, Zholai Parsi chuan Taiban-te hian an banner kengte an pawhthler sak bakah, an mobile phone pawh an laksak bawk niin a sawi. Hemi rual hian hmeichhiate dikna chanvo humhalh tuma beih chhunzawm zel an tum thu an sawi.

Aghanistan-a Taliban-ten thuneihna an chan hnu hian hmeichhiate zalenna pek tiam mah se, hmeichhiate hi nasa taka khuahkhirh an ni a, kum 1996-2001 inkara an dan khauh tak ang kha an kalpui leh tawh a ni. High school chinah hmeichhiate kal an khapsak a, sorkar hna thawk hmeichhia tam tak pawh kal chhunzawm an phalsak lo bawk. Hei bakah hian hmun hla zawka zin turin hmeichhiate chu mahni chauha an kal chhuah phalsak an ni lo a, an chhungte mipa tuber emawin an kalpui zel a ngai a ni. Khawpui chhunga public garden leh park-ah pawh hmeichhiate kal theih ni siam niin, heng hunah hian mipa kal phalsak an ni lo thung.

Taliban thuneitute hian lungawi lohna lantirn, a bikin US laka lungawi lohna lantirna rally huaihawtte chu phal mah se, hmeichhiaten rally huaihawt erawh a phalsak lo a ni. Inrinnia hmeichhiate kawngzawh lai lo cover-tu journalist ṭhenkhat pawh Taliban sipaite hian kut an thlak tel bawk a ni.