Salman Rushdie-a'n ṭhat lam a pan zel

Ziakmi Salman Rushdie chu Inrinni liamtaa New York-a literary event-ah chemtea vih a nih hnuah nizan aṭang khan ventilator hmang ngai loin a awm thei tawh a, a ṭawngchhuak leh thei tawh a, a dinhmun pawhin ziaawm lam a pan zel.

Rushdie hi event-a thu a sawi dawnin pawikhawihtu hi dawhsanah rawn chhoin chemtein a vit zui a, staff leh mipui pungkhawmte chuan an man nghal a ni. Rushdie kawmtu, Ralph Henry Reese pawhin a hmaiah hliam a tuar a, mahse damdawiin aṭanga chhuah a ni tawh tih police chuan an sawi.

Thlawhtheihna hmangin Rushdie hi damdawi-in lam panpui a ni a, emergency surgery neih nghal a ni. A agent chuan a mit lehlam khaw hmuhna a chhe maithei tih sawiin, a banah hliam na tak tuarin, a thin pawh vih tel a nih thu a sawi a ni. Prosecutor-te chuan Rushdie hi vawi 10 zet chem hian vih a ni tih an tarlang.

Rushdie vittu, kum 24 mi Hadi Matar chu thubuai siamsak nghal a ni. Matar chuan tualthah tuma bei a nih loh thu a sawi a, mahse Rushdie ukil-te chuan tum lawk ngeia tualthah tumna a ni, an ti thung.

Ram hrang hranga ziakmi, activist-te chuan Salman Rushdie chunga pawikhawihna thleng chu an dem thu sawiin, right to free speech bawhchhiatna a ni, an ti.

Salman Rushdie hian kum 1998-a a lehkhabu tihchhuah, The Satanic Verses vangin kum 30 chuang chu thaha vauna vawi tam tak a lo tawk tawh a ni.