Jerusalem-a bus beihnaah Israel mi 7 an hliam

Jerusalem-a Old City-ah nimin khan silai keng mi pakhatin Juda mite chuanna bus a bei a, mi pasarih an hliam.

He pawikhawihna hi nimin zing lama thleng niin, bus hian Juda mite ṭawngṭaina hmun, Western Wall bula parking lot-a ding a ni. Hliam tuar zingah hian nu, naupai lai pawh a tel.

Pawikhawihtu hi a tlanchhe nghal a, mahse a hnuah police-te kutah a inpe leh a ni. Palestinian mi, East Jerusalem-a cheng a ni.

Israel prime minister Yair Lapid chuan he thil thleng chungchangah thuchhuah siamin, Israel mite bei leh tinatu chuan a pawikhawih man a pe ngei ang tih a sawi.

Israel leh Palestinian-te chu Gaza Strip leh West Bank-ah tun hnaiah nasa takin an lo inbei tawh a, kar liam ta khan Israel fighter jet chuan Gaza-a Palestinian armed group, Islamic Jihad hmunte beiin, an pawl hotu pakhat pawh a lo mansak tawh bawk. Islamic Jihad-ten Israel beihna atan rocket tam tak an kapchhuak a, mahse rocket tam zawk hi chu Israel lam hian an lo kahthlak sak a ni. He inbeihnaah hian Palestinian mi 49 an thi a, an zingah hian Islamic Jihad commander pahnih an tel. Hliam tuar tam tak an awm bawk. Israel mi zingah thi leh hliam an awm lo.

Egypt hmalaknain kar liam ta vek khan an inbeihna hi titawpin, inkahhai puang turin inremna an siam a ni.