Venezuela eptu hruaitu jail aṭangin chhuahtir

Venezuela-a eptu hruai­tu, Leopoldo Lopez chu jail aṭangin chhuah tir niin, house arrest-a hren zui a ni.

Supreme Court of Justice chuan kum 14 dawn tang tura hren, Leopoldo Lopez hi a hriselna a ṭhat loh vangin a tan tur la awmte chu house arrest-a a tlak a phalsak a ni. Inrinni zing khan jail aṭangin chhuah a ni a, Caracas-ah a inah hren zui a ni.

Right-wing opposition hruaitu, Lopez hi sorkar duh lohna lantira tharum thawhna chawk chhuak, sorkar hmun pawimawh suasam leh hal bakah, pawikhawihna thlen tura phiarruknaa inhnamhnawiha puhin kum 2015, September thla khan kum 13 leh thla kua tang turin hrem a ni. Miranda state-a Ramo Verde-a sipai tan-inah dah a ni.

Kum 2014 khan Vene­zuela sorkar duh lohna lantirin nawrh huaihawt a ni a, buaina chhuakah mi 43 thiin midang 800-in hliam an tuar a, sorkar hmun pawimawh tam tak tihchhiat a ni bawk niin, Venezuelan News Agency (AVN) chuan a tarlang.

Venezuela President Nicolas Muduro chuan Supreme Court-in jail aṭanga Lopez chhuahna tur thu­tlukna a siam chu a zahin a thlawp tih a sawi a, boruak muanawm tak a awm a beisei thu a sawi. Hetih lai hian Lopez hian jail aṭanga chhuah a nih hnu lawkah amah thlawptute chu President Maduro duh lohna lantir turin a sawm zui nghal a ni.