Russia leh NKorea-in thawhdunna an tilian zel dawn : Vladimir Putin
Russia president Vladimir Putin chuan North Korea hotu Kim Jong Un hnenah ram pahnihte chuan inremna huamzau leh mumal zawk an neih chhunzawm zel dawn tih a hrilh niin NKorea state media chuan nimin khan a sawi.
Korea liberation day puala Kim hnenah lehkha a thawnah, Putin chuan thawhdunna thuk zawk neih chhunzawm zel chu ram pahnih duh dan pawh a ni a, an thawhdunna chuan Korean peninsula bakah Northeastern Asian region venhimna leh boruak ngelnghet zawk a awmna turin a pui dawn a ni, a ti.
Ram pahnih inkara thawhdunna kawng hrang hrangte chu ram dang sipaite mit tikhamtu leh vauna tichhuak ramte tithinurtu a ni, tiin Kim chuan Putin hnena lehkha a thawn letah a sawi ve bawk. KCNA chuan heng ramte hi sawilang lo mahse, United States leh a thawhpui ramte sawinan an hmang ṭhin a ni.
Kim chuan kum 2019-a inremna an ziah khan Russia leh North Korea thawhdunna chu a ṭhang zel dawn tih a lo sawi tawh a ni.
NKorea hian July thla khan, Russia thlawp Ukraine khawchhak bial pahnih chu independent state-ah a pawm thu a lo puang tawh a, official-te heng hmunah hian in sak leh hna dang thawk turin NKorea mite tirh an nih tur thute pawh an lo sawi tawh bawk.