Egypt-a biakin kangah mi 41 thi

Egpty khawpui Cairo-a Coptic Kristian biak-inah Pathianni khan kangmei a chhuak a, mi 41 an thi tih church official-te chuan an sawi.

Cairo khawpui hmar thlang lama awm, Abu Sifine biak-in kanna chhan hi hriatchian a la ni lo.

President Abdel Fattah al-Sisi chuan, "State service zawng zawngte'n chak taka hma an lak theihnan thupek ka tichhuak a ni," a ti.

Middle East-a Kristian community zingah Copts hi an lian bera, Egypt-a cheng mi maktaduai 103 zingah mtd 10 vel an awm a ni.

Africa ram hmar lama Muslim tamna hmun leh Arab mi fuankhawmna hmunah hian sakhaw tlem zawkte hian tihduhdahna leh sawisel an tawk fo ṭhin a ni. Copts-te hian Islamists kut an lo tuar fo tawh a, a bikin kum 2013-a Abdel Fattah El-Sisi-a'n Islamist president Mohamed Morsi a paihthlak khan biak-in, school leh chenna in tam tak halsak an ni.

Egypt president zinga kumtina Coptic Krismas mass hmanpui ziah awmchhun, Sisi hian an ram chanchina a vawi khatnan rorelna sang, Constitutional Court-ah Coptic judge a lo ruat tawh bawk.

Egypt-ah hian kangmei nasa tak a lo chhuak fo tawh a, kum 2021 March thla khan Cairo khawpawna textile factory-a kangmei chhuakah mi 20 vel an lo thi tawh a ni. Kum 2020-a damdawi-in pahniha kangmei chhuakah Covid-19 kai enkawl mek mi 14 an lo thi tawh bawk a ni.