New Zealand-in Britain-ah Ukraine sipaite training pe dawn

New Zealand sorkar chuan Ukraine indona hmuna ral hmatawnga awm sipaite training pe turin sipai 120 chu Britain-ah an tir dawn tih nimin khan a sawi.

Infantry training team pahnihte hian Ukraine sipaite chu indo nunchan zirtirin, ralthuam hman dan, combat first aid, operational law leh thiamna dang an zirtir dawn a ni.

Sorkar thuchhuah chuan an sipaite hi Ukraine-ah zin loin, Britain-a Ukraine sipai 800 vel training hi an pe dawn tih a sawi nghal bawk. "Ram khat thuneihna leh mihring pawisawi lo nunna laksak hi a dik lo a, pawm zam mai kan tum lo a ni. Kan demna thu hi ṭawngka maia lantir loin chhawmdawlna pawimawh tak pek tel kan duh a ni," tiin prime minister Jacinda Ardern chuan a sawi.

New Zealand sipaite chu Ukraine-a indonaah an la inhnamhnawih loh thu leh an tel ve ngai dawn loh thu a sawi zui bawk. New Zealand-a defence lam hnathawk mi 30-te chuan May thla khan Ukrainian military personnel-te chu artillery hman dan chungchangah training an lo pe tawh bawk a ni.

February 24-a Russia-in Ukraine ram a beih hnuah New Zeland hian Ukraine rawm ṭanpuina tur hian USD mtd 25.70 vel a pek tawh bakah, Russia mi leh pawl 840 vel hrekna a siam tawh bawk.