Iraq sipaiten Mosul-ah hnehna chang

Iraq Prime Minister Haider al-Abadi chuan Pathianni khan an ram khawpui lian pahnihna Mosul a tlawh a, Iraq sipaite chu Islamic State (IS) firfiak pawl laka hnehna an chan tak avangin lawmpuina a hlan.

Iraq sipaite hian IS kut aṭanga Mosul laklet tum hian nikum tawp lam aṭang khan beihpui an thlak ṭan a, thla riat zet an inbeih hnuah he khawpuia firfiakte rorelna chu an titawp thei ta a ni. Sipai leh firfiakte inbeihna avang hian khawpui chhung hmun tam tak tihchhiat a ni a, civil mi sing tel an thih bakah, mi nuai tel chu hmun him lamah an tlanchhia a ni.

Mosul-a Iraq sipaiten beihpui an thlaknaah hian US kaihhruai ṭangrual ramte chuan an lo pui bawk a ni. Khawpui chhunga inkhuar firfiakte chuan an thih thlengin security force-te chu an bei let dawn tih sawi mah se, Iraq sipai thupuangtu Brigadier General Yahya Rasoool chuan Mosul aṭanga River Tigris kaltlanga tlanchhiat tum, firfiak 30 chu Pathianni khan an kaphlum tih a sawi. Firfiakte hian hualchep an nih hnuah an sahimna turin civil mite chu inphenna atan an hmang a, thihchilh bomb tipuak turin hmeichhiate an tir chhuak bawk.

Mosul-a indonaah hian Iraq security force lam pawh an inhloh nasa hle. Sorkar chuan sipai thi zat dik tak hi a tarlang lo a, US Department of Defence-in a tarlan danin, Mosul beihnaa hmahruaitu, Counter Terrorism Service-a sipai 40% vel chu an thi niin a sawi. US Defence Department hian Iraq sipaite puihna atan hian US budget fund aṭangin, kum 2018 atan dollar tluklehdingawn 1.269 a dil sak a ni.

Kum thum kalta khan IS hotu Abu Bark al-Baghdadi chuan Syria leh Iraq-a an ram lak chinah Islamic sram din a nih thu a puang a, a hnu kar khatah Iraq PM Abadi chuan IS ram din chu pawm a nih loh thu a sawi a ni. Firfiakten Mosul khawpui an luah chhung hian he khuaa hmanlai hmun leh thil hlu tam tak an tichhia a, United Nations chuan khawpui chhunga infrastructure siamṭha leh tur hian dollar tluklehdingawn khat chuang a ngai dawn niin a sawi.