Turkey-ah eptu pawlten kawngzawh huaihawt

Turkey-a eptu pawl lian ber, Republican People’s Party (CHP) chuan Pathianni khan an ram khawpui, Ankara-ah kawngzawh ‘Justice March’ an huaihawt a, sorkar laka an thil phut hrang hrang 10 an tarlang. Eptute thil phut zingah hian state of emergency hlih pawh a tel a ni.

Nikum July thlaa sipai ṭhenkhat kaihhruaia sorkar paithlak tuma beih a nih hnu khan sorkar chuan state of emergency hi a puang a, tun thlengin hman chhunzawm a la ni.

Ankara-a eptute pawl kawngzawhnaah hian mi maktaduai khat chuang an tel a, an ram hnam puanzar te kengin, rorelna dik an duhna thuziakte an keng tel a ni. CHI hruaitu Kemal Kilicdaroglu chuan kawngzawh an huaihawt chhan chu sorkar laka lungawi lohna campaign an neih tur peng pakhat a nih thu a sawi. Sorkar paihthlak tuma beihnaah CHP parliment member Enis Berberoglu chu sorkar phiarrua puhna thubuaiah thiam loh chantir a ni a, tan tir a ni tawh bawk. Kilicdaroglu chuan sorkar chu democratic parliamentary system awpbeh tuma a beihna tihtawp turin an phut tih a sawi.

Sorkar paihthlak tuma inhnamhnawiha puhte dap­chhuah hna thawhah, sorkar chuan sorkar hnathawk nuai khat chuan a ban tawh a, mi 50,000 chuang man an ni tawh bawk.

Kilicdaroglu chuan sorkar lakah an thil phut 10-te tarlangin, heng hi tihhlawhtlin a nih hma chuan an nawr zel dawn tih a sawi. An thil phut zingah hian parliament hnena thuneihna pek let te, state of emergency hlih leh, roreltu leh journalist mante chhuah tirte a tel a ni.