Hri kai tam ber ni thleng leh

World Health Organisation (WHO) chuan kar liam ta Inrinni kha khawvel pumah Covid-19 kai hmuh chhuah tam ber ni a thleng leh tih sawiin, hemi nia hri kai hmuh chhuah mi 260,000 dawn an tling. Hri kai hmuh chhuah tam zualna ram chu US, Brazil, India leh South Africa ramte an ni. 

Covid-19 vangin Inrinni vek  khan mi 7,360 an thi a, May 10 hnua ni  khata hri vanga thi an tam ber ni a ni bawk. Khawvel puma hri kai  hmuh chhuah tawh chu mi maktaduai 14 an chuang tawh a, mi 605,356 an tling tawh bawk a ni. 

US chu hri kai tamna leh hri vanga thi tamna ber ram a la ni chhunzawm zel. Hri kai hmuh tawh hi mi 38,33,716 an awm tawh a, an zinga 1,42,881 in an thihpui tawh a ni. US-ah hian lockdown kalpui duh lo, chhim lam state 

ṭhenkhatah hri leng hi a hluar zual. 

Florida state chu US-a hri leng hluarna ber state a ni mek a, Inrinni khan an state-ah hian hri kai thar mi 10,000 chuang leh hri vanga thi mi 90 an awm a ni. Texas leh Arizona state-ah pawh hri kai hi an pung chak hle bawk. 

Brazil-ah pawh hri kai hi maktaduai hnih an chuang tawh a, mi 78,817 in an thihpui tawh bawk. Brazil ramah hian thla hnih chhung khan hri kai hmuh thar mi 30,000 chuang an awm ni hi ni 26 zet a awm a ni.

India, Russia, South Africa, Peru, Mexico, Chile, Spain leh UK-te chu hri kai tam zualna ram 10 zingah an tel. Hetih lai hian Europe ram tam zawkah hri leng hian ziaawm lam a pan avangin khuahkhirhna an siamte pawh thlahdul chhoin, ramrite pawh an hawng ṭan tawh a ni. 

Covid-19 hripui leng mek chu khawvel ram zawng zawng deuhthawin an buaipui laiin, hri kai awm lo nia inchhal ram ṭhenkhat an la awm. Kiribati, Marshall Islands, Micronesia, Nauru, North Korea, Palau, Samoa, Solomon Islands, Tonga, Turkmenistan, Tuvalu leh Vanuatu ramte chuan an ramah Covid-19 kai an awm lo tih an sawi.