EU-in summit pawtsei

European Union (EU) summit, ni hnih awh tura tih chu nimin khan an pawhsei leh. 

Summit hi kar liam ta Zirtawpni leh Inrinni-a neih a ni a, mahse EU hruaitu mi 27-te chu EU multi-annual budget leh Covid-19 hri vanga economy tlahniam chawinun lehna tur atana recover plan an siamah an inrem theih loh avangin nimin khan an neih chhunzawm leh a ni.  

He summit-ah hian European Commission chuan recover plan atan hian Euro vaibelchhe 750 a rawt a, kum 7 chhung EU budget tur atan hian euro trillion 1 aia tam rawtna a lut bawk a ni.

Recover plan euro vbc 750 zinga Euro vbc 500 hi hri leng tuar nasa zual ramte tan non-repayable grant angin pek tum a ni a, a dang euro vbc 250 hi loan anga pekchhuah tum a ni bawk. Mahse he rawtna hi EU member ṭhenkhatte chuan an sawisel. Frugal Four an tih Netherlands, Denmark, Sweden leh Austria ramte chuan non-repayable grant hi an duh lo a, Europe ram zinga Covid-19 hri lengin a nghawng nasat ber ram pahnih Spain leh Italy chuan an thlawp thung.

Summit hruaitu EC president Michel chuan an summit neih ni hnih­naah (Inrinni) non-repayable grant atana pawisa ruahmansa euro vbc 500 chu euro vbc 450 ah tihhniam a rawt a, hei bakah hian emergency atana hman turte pawh rawtna a siam belh bawk. 

Recover plan atana non-repayable grant-a euro vbc 500 pawisa ruahman hi EU member ram aiawha palai kal ṭhenkhatte chuan an sawisel a, loan zawka pek hi an thlawp a ni. Recover plan atana pawisa dah hi EU kum 7 financial framework zinga mi a nih avangin pawisa rulh let ngai lo ai chuan rulh let ngai duhtu hi an awm phah a ni.