Syria-in parliamentary inthlanpui nei

Syria chuan ṭum hnih lai parliamentary inthlanpui neih a tum hun tur a sawn hnuah, an rama sorkarin a thunun ram bialah nimin khan parliamentary inthlanpui neih a ni.

March 3 khan Syria president Bashar al-Assad chuan April 13-ah inthlan hi neih tum a nih thu a sawi a, mahse Covid-19 hri leng vangin May 20-a sawn a nih hnuah, nimin khan inthlanna hi an nei thei ta a ni. Nimina inthlanna  neihah hian candidate 2,000 chuang an awm.

Syria parliament-ah hian seat 250 a awm a, chak tur chuan seat 126 lak a ngai a ni. Parliament inthlan hi dan angin kum li danah neih ṭhin a ni a, kum 2016-a neihah khan rorel lai, Bashar al-Assad kaihhruai ṭangrual pawl National Progressive Front chuan hnehna an chang a ni.