Colombia President-in FARC member-te ngaidam

Colombia President Juan Manuel Santos chuan nikuma sorkar nena inremna thuthlung ziaktu, helpawl FARC member 3,600 te ngaihdamna a ziak fel ta.

Sorkar nena inremna thuthlung an ziah hnuah, FARC hian thla hmasa khan an ral­thuamte chu thuneitute kutah an pe fel tawh a ni. Colombia-a United Nations mission-a ralthuam an thehluh hi 7,000 a tling a ni.

President Santos hian helpawl member-te ngaihdamna thupek a ziah vawi thumna a ni. FARC membre ngaihdam hi 7,000 an tling tawh.

Thawhṭanni khan United Nations Security Council chuan Colombia sorkar leh FARC helte inremna siam hi a taka kalpui a nih dan enpui turin Colombia rama mission thar siam a rel a, September thla aṭangin he mission hian hna an thawk ṭan ang.

Colombia rama helpawl hlun ber, FARC hi kum 1964 khan ram neilo mi retheite dikna chanvo humhalh sak turin din a ni a, kum 50 chuang zet an hel hnuah kum 2012 khan inremna kawng zawngin sorkar nen inbiakna an nei ṭan a ni. Sorkar leh helpawl aiawhte hi Cuba-ah inbe

ṭhinin, kum li zet inbiakna kalpui a nih hnuah nikum khan inremna an siam thei ta a ni. Inremna thuthlung an siam dan hi ram mipuiten an duh lo a, hemi hnu hian siamṭhat leh a ni a, Congress chuan he inremna siam hi a pawmpui tawh a ni.

Inremna an siamah hian FARC chuan an helna titawp a, an ralthuamte thuneitue kuta thehlut a, an pawl chu political party anga din zui a remti a ni. FARC member zingah pawikhawihna lianthama inhnamhnawih lote chu ngaihdam vek tura tih an ni bawk.

President Santos hian remna leh muanna a awm theihna tura a hmalakna avangin khawvel chawimawina sang, Nobel Peace Prize pawh a lo dawng tawh a ni. FARC nena inremna an siam hnuah, Santos chuan helpawl lian pahnihna, National Liberation Army (ELN) chu inremna siampui tumin inbiaka a neihpui leh mek a ni.