Kum hnih tang turin Nabeel Rajab hrem

Bahrain court chuan human rights activist lar Nabeel Rajab chu thu dik lo thehdarha puhnaah thiam loh chantirin, kum hnih jail tang turin a hrem.

Rajab hi Bahrain lal­ram chungchanga thu belhchian dawl lo theh­darhah puh a ni a, a thu thehdarh hi an ram dinhmun leh zahawmna ngaihnepna nia lam hawi a ni. Court-in thiam loh a chantirna hi a duh chuan a appeal thei ang.

Kum 52 mi, Rajab hi a thubuaiah thiam loh chantir a nih lai hian damdawi-inah a awm avangin court-ah a inlan thei lo. Amah hi kumin April thla aṭang khan damdawi-inah enkawl a ni. Rajab hremna pek a nih dan chu an dem thu Bahrain Institute for Rights and Democracy chuan an sawi a, Rajab chu journalist-te a biak avanga hrem nia sawiin, a thubuai tihfel a nih hma pawh hian kum khat chuang zet midangte bepawp thei loa hren a ni tawh a ni, an ti.

Amnesty International pawhin court thutlukna chu sawiselin, Bahrain thuneitute chuan sorkar sawiseltute awpbeh a tum a ni, an ti. Nabeel Rajab hian human right palzut a nih chungchangah a ngaihdan a sawichhuak mai a ni tiin, Amnesty Secretary-General Salil Shetty chuan a sawi.