Mosul-a pawikhawihna thleng chhui chian phut

Khawvela Human Rights pawl lian ber Amnesty International chuan Iraq sipaiten Islamic State (IS) firfiakte kut aṭanga Iraq khawpui lian pahnihna, Mosul khua laklet tuma an inbeihnaah civil mite chunga pawikhawihna thlengte chhui chian an phut.

Amnesty International Middle East research director, Lynn Maalouf chuan Mosul-a inbeihna thlengah hian civil miten pawl lehlam lehlam aṭangin an tuar nasa hle tih an sawi a, civil mite chunga pawikhawihna thlentute chu hrem lohin an chhuak tur a ni lo, an ti. Iraq chuan Pathianni khan Mosul khua chu IS kut aṭangin laletin hnehna a chan thu a lo puang tawh a ni. Mahse firfiakte kut aṭanga Mosul laklet tuma an inbeihnaah hian mi sang tel an thi a, khawpui chhunga hmun pawimawhte pawh a chhe nasa hle. Iraq sipaite hian nikum October thla aṭang khan Mosul lakkir tum hian beihpui an thlak a ni. Sipaite nena an inbeihnaah firfiakte hian civil mite hi inphenna atan an hmang nasa hle a, khawpui aṭanga tlanchhiat tum civil mi tam tak an that a, an ruangte chu vantlang hmuh theih turten an khai niin Amnesty chuan a sawi.