Palestinian mi chaw ngheia nuar mek Chhuah tura ngenna Israel court-in a hnawl

Israel military court chuan tan-ina tang mek, ni 165 chhung chaw ngheia a nawrh tawh avanga a hriselna dinhmun tlahniam chak tak, Palestinian mi Khalil Awawdeh chhuah tura ngenna chu a hnawl.

Israeli sipaite chuan nikum December thla khan kum 40 mi, Awawdeh hi armed group member zinga mi nia puhin an man a, mahse Awawdeh chuan an puhna hi a pha tih a lawyer Ahlam Haddad chuan a sawi.

Haddad chuan Thawhṭanni khan military court chuan chhuah tura an ngenna chu an hnawl tih a sawi. Nawrh a huaihawt chhung hian ni 10 chhung vitamin injection a lak bak chu engmah a ei lo tih a chhungte chuan an sawi bawk.

Physicians for Human Rights Israel, Dr Lina Qasem-Hassan chuan Ningani liam ta khan Awawdeh dinhmun a ṭhat loh avangin damdawi-inah a va tlawh a ni. Dr Lina chuan Awawdeh hi kg 42 chauha rit a ni tawh a, khumah handcuffed hmanga hrenbeh a nih bakah guard-in an hual reng a ni, a ti. "A nunna chu dinhmun derthawng takah a ding tawh a ni," tiin rights group chuan thuchhuah an siam.

Israel hian Palestinian mi tang 4,450 vel an kawl mek a ni. Heng zinga mi 670-te chu administrative detention hmanga hren a ni. Israel tan-ina Palestinian tang mek zingah hian naupang 175 leh hmeichhia 27 an awm tih prisoners rights group Addameer chuan a tarlang.