Kenya President thlannaah Deputy President a chak

Kenya deputy president nilai, William Ruto chuan President thlanna neih zawh takah hnehna a chang tih electoral commission chairman chuan Thawhṭanni tlai khan a puang.

Independent Electoral and Boundaries Commission (IEBC) chairman Wafula Chebukati sawi danin, Ruto hian vote tla aṭangin 50.49% hmuin, opposition leader Raila Odinga-an 48.85% a hmu thung a ni.

President inthlan result puan a nih hnu lawkah, ram chhunga hmun ṭhenkhat, a bikin Odinga ṭhatna hmun Kenya khawthlang lam, an khawpui Nairobi leh khawchhak lamah Odinga thlawptute chuan lungawi lohna an lantir zui nghal.

Kenya khawthlang lama Kisumu khawpuiah te,Nairobi hmun ṭhenkhat, Kibera leh Mathare hmunahte Odinga ṭantute chuan President thlanna neihah thil dik tawk lo a awm nia sawiin, inthlan result chu an pawm loh avangin an pungkhawm a, police-te nen pawh an innawr a ni.

Hetih lai hian President atan thlan tlin a nihna certificate a dawn hnuah, kum 55 mi Ruto chuan politics lama a khingpuite chu thawhpuiah sawmin, an ram inpumkhatna tur leh hma an sawnna tura thawhho puiah a sawm. Sorkar langtlang, inhawng tak leh democracy kalphung siam ngei a tiam bawk.