Haiti-in sipai din thar leh dawn
Haiti sorkar chuan kum 20 liamtaa an ram sipai a ṭhiah chu din thar leh tur a tum.
Ramri veng tur leh, khuarel chhiatna thleng tuartute chhanchhuah leh puih hna thawk turin sipai atan hian mipa leh hmeichhia 500 vel lakthar a tum a ni. United Nations-in Haiti-a a hnathawh chu kumin October thlaah hian tawpsan a tum tawh thu a sawi hnuah, sorkar hian sipai din thar a tum thu hi a puang a ni.
Hetih lai hian sawiseltu lam chuan ram rethei tak, Haiti hian sipai din thar loin, a budget te chu national police force-a officer 15,000 awm mekte tana hmang zawk tura an duh thu an sawi.
Ministry of Defence chuan thuchhuah siamin, sipai lakthar tur hi kalpui mek a ni a, mipa leh hmeichhia, kum 18-25 inkar, secondary education exam zo tawhte tan dil theih a ni tih an sawi.
UN Security Council chuan April thlak khan Haiti-a security force a dah, blue helmet tia sawite chu kohkir a lo remti tawh a, Haiti police-te pui turin police tlem a zawng chauh dah chhunzawm a tum a ni. UN sipaite lakchhuah an nih dawn avang hian sipai din thar ṭha ti leh ti lo inkarah inhnialna a tam hle. Politician tam tak chuan sipai hi din thar a nih chuan ṭhalai tam tak tan hna an siamsak dawn avangin ṭha an tih thu an sawi. Mahse sorkar sawiseltu lam chuan sipai hi din ni mah se, sorkarin politics khelhna hmanruaah hmangin, prime minister leh president-te’n an hmanraw pawimawh takah an hmang thei dawn niin an sawi ve thung.