Qatar leh US-in inremna ziak

US leh Qatar chuan sum hmanga firfiakte pui ṭhin do letna tura thawhdunna tur inremna thuthlung an ziak.

He inremna hi Cairo-ah US Secretary of State Rex Tillerson leh Qatar Foreign Affairs Minister Mohammed bin Abdulrahman Al Thani-te’n an ziak. Ram pahnihte hi hemi kawngah hian kum khat an lo thawkdun tawh niin Tillerson chuan a sawi.

Kum 2014-a Riyadh Summit-a inremna an siam­ah, ram pahnihte chuan firfiaka chetna thleng ṭhin leh, sum hmanga puitute do letna kawngah thawhdunna turin ruahmanna hrang hrang an siam a ni. Inremna an ziah hnua thuchhuah an siamah, Al Thani chuan US nena inremna an ziah chu tunhnaia Qatar leh Arab ram pali-te inkara buaina thleng mek nen inzawmna a neih loh thu a sawi.

Arab ram pali - Saudi Arabia, United Arab Emirates, Egypt leh Bahrain ramte chuan Qatar hi firfiakte thlawp leh sum hmanga pui ṭhinah puhin an inzawmna an lo chhu chat tawh a, Qatar nena an inkalpawhnate pawh an khar a ni. Qatar chuan an puhna hi thu dik lo a nih thu a sawi thung.