US-Russia palaite inhmu dawn
US leh Russia palaite chu July 17 hian Washington-ah an inhmu dawn a, ram pahnihte inkara harsatna awmte chinfel dan an ngaihtuah dawn a ni.
US State Department-a third-in-command, Thoman Shanoon chuan Russia deputy foreign minister Sergei Ryabkov chu Washington-ah a hmu dawn tih State Department thupuangtu Heather Nauert chuan a sawi. Russia hian June thla tawp lama St. Petersburg-a ram pahnih palaiten meeting an neih tur chu a lo ṭhulh tawh a, hei hi US-in an ram hrekna thar a siam chu Ukraine tualchhung buaina nena inkaihhnawih thil a nih vang niin a sawi.
Shannon leh Ryabkov-te hian US President hmasa, Barack Obama hunlaia Russia hrekna siam chungchangte an sawidun dawn a ni. Obama hunlai hian Russian palai leh spy nia puh mi 30 chu hnawhchhuah an ni a, hei bakah hian Russian residential complex pahnih pawh khar a ni. Ram pahnih palaite hian Syria leh Ukraine tualchhung buaina thleng mek chungchangte pawh an sawidun ang.