Brazil president hlui tang turin hrem

Brazil President hlui Luiz Inacio Lula da Silva chu eiruk thubuaiah thiam loh chantir a ni a, kum kua leh a chanve tang tura hrem a ni.

Lula hi Brazil construction company lian, OAS hnena aṭangin thamna dollar maktaduai khat chuang man, Sao Paulo tuipui kama luxury apartment dawngah puh a ni. Lula-a legal team chuan finfiahna ṭha awm lo chunga thiam loh chantir nia sawiin court thultlukna siam chu an sawisel a, President hlui chuan tihsual a nei lo a, kum thum chhung zet politics lama inbeihna hmanga beih a ni tawh a ni, an ti.

Lula team chuan court thutlukna siam hi appeal an tum tih an sawi a, a appeal-na hi ngaihtuah a nih hma chuan jail-ah dah a ni rih lo ang.

Trade union hruaitu hlui, Lula hi kum 2003 - 2010 chhung khan Brazil president a ni a, a president chhung hian Brazil-in hma a sawn nasa hle a, mi nuai tel chu retheihna khur aṭanga khaichhuah an ni. Lula chuan kum 2018-a an ram president thlanna neih turah a party, Workers Party hminga chuh leh a tum thu a sawi a, mipui ngaihdan lakah pawh a thleng sang hle a ni. Court-in a appeal-na hi a pawmsak loh chuan president thlanah hian a chuh thei dawn lo a ni.

Workers Party hruaitu, Senator Gleisi Hoffmann pawhin court rorel dan chu sawiselin, president ni thei lo tura Lula dan tumna hmanrua niin a sawi. Court rorel dan duh lohna an lantir tur thu a sawi bawk. Lula hi Brazil rama politician lar ber zing ami a ni a, US president hlui Barack Obama chuan khawvela politician lar ber tiin a lo sawi tawh ṭhin. Eiruknaa inhnamhnawiha puh a nihna hian a hming tichhe mah se, an ram mipuite zingah a la lar reng a, an ram tana thil ṭha tam tak thlentu tiin an la hre reng a ni.