Israel leh Turkey-in gas deal siam dawn
Israel leh Turkey chuan Turkey leh Europe-a Israel natural gas pek chhuakna turin inremna chu kumina tihfel hman an tum niin, Israel Energy Minister Yuval Steinitz chuan a sawi.
Istanbul-a 22nd World Petroleum Congress session-ah he thu hi sawiin, Israel minister chuan inremna siam tur chungchangah pawh Turkey minister Berat Albayrak nen inbiakna ṭha tak an neih thu a sawi. Kumin kumtawp hma ngeiin Israel-Turkey pipeline siam hna chu ṭan hman tum a ni, a ti. Steinitz chuan inremna tifel tur hian theihtawp an chhuah tih sawiin, Turkey minister Albyarak pawin kumin chhung ngeiin Israel tlawh a tum tih a sawi ve bawk.
Turkey leh Israel company-te chuan gas pipeline project chungchang hi an sawiho mek a, he pipeline hi Israel tuipui kama Leviathan gas field aṭanga Europe-a natural gas pekna tur a ni. Ram pahnih minister-te hi nikum October thla khan world energy congress neih denchhenin an lo inhmu tawh bawk. Israel leh Turkey inkar boruak hi kum 2010-a Israel sipaiten Gaza pan tum Turkey lawng an beih avangin a chhe hman hle a, he lawng beihnaah hian Turkey mi 10 an thi a ni. Kum ruk zet an inkar boruak hi chhe chhoin, palaite pawh an ko kir a ni. Mahse an inkar boruak hian ṭhat lam a pan leh tawh a, ambassador-te pawh dah leh tumin hma an la mek a ni.