Philippines sipaite beihpui thlaknaah sipai pahnih thi

Philippines sipaiten Marawi City-a Islamist firfiakte laka beihpui an thlaknaa an tihsual palhah sipai pahnih an thi tel.

Sipaite hian Marawi-a firfiakte awmna hmun bomb an tum a, mahse an target hi ṭhelhin a bula buidling a fuh a, hei hian sipaite delhin mi pahnih an thi niin sipai thupuangtu, Lieutenant Colonel Jo-Aar Herrera chuan a sawi.

Herrera chuan in chim hian sipaite hi delhin vanduaithlak takin mi pahnih an thi tih a sawi a, hei thil thleng hi pawi an tih thu a sawi bawk. Sipai dang 11-in hliam an tuar bawk a, hliam tuarte hi damdawi-in panpui nghal an ni.

May thla khan firfiak ho beihna atana bomb thlakah sipai 11 an lo thi tawh bawk a ni. Islamic State (IS) pawl zawmpui firfiakte hian May 23 aṭang khan Marawi City hi an luah a, sorkarin khawpui hi firfiakte kut aṭanga laklet tumin beihpui a thlak zui nghal a ni. Sipaite hian hma an sawn zel a, President Rodrigo Duterte chuan firfiakte laka hnehna chang turin ni 15 vel an la mamawh niin a sawi.

Marawi City-a inbeihnaah hian mi 500 chuang an thi tawh a, an zingah hian firfiak 389 an tel a, security force 90 leh civil mi 39 an thi tel bawk.