Nobel laureate Liu Xiaobo a thi

Khawvel chawimawina sang, Nobel Peace Prize lo dawng tawh, Chinese human rights activist Liu Xiaobo chu thin cancer vangin Ningani zan khan a thi.

Liu Xiaobo hi China sorkar policy a sawisel avang leh, democracy a thlawp avangin man a ni a, kum 2009 khan kum 11 tang tura hrem a ni. Jail-a a tan hnuah kum 2010 khan Nobel Peace Prize dawng tura thlan a ni a, mahse he chawimawina dawng tur hian China sorkar chuan a kalchhuah a remti lo a, chawimawina semna hmunah pawh a ṭhutna tura chair ruahman chu dahruah a ni.

Thin cancer a vei tih hriatchhuah a nih hnuah Liu hi jail aṭanga chhuahtirin hmarchhak lama Shenyang khuaa China Medical University First Hospital-ah enkawl zui a ni. Damdawi-inah pawh hian venhimna khauh tak hnuaiah dah a ni. Thawhṭanni aṭang khan intensive care unit (ICU)-ah dah a ni a, Ningani zan khan a thi ta a ni.

Ram hrang hrangte chuan ram pawn lama inenkawl tura zinchhuah phalsak turin China sorkar an ngensak a, amah Liu pawhin a duh nia sawi a ni. Mahse China chuan an ngenna hi a remtihsak lo. Official-te chuan Liu-a taksa peng hrang hrangte chuan hna an thawk ṭha tawh lo tih sawiin, Ningani zan khan thlamuang takin a chawl ta tih an sawi. A thih lai hian a nupui leh a chhungte dangin an awmpui niin doctor Teng Yue chuan a sawi bawk.

Nobel Committee chuan China-in ram pawn lama kalchhuah a phalsak loh avangin Liu chu a hun hmain a thi niin an sawi a, China rorel dan chu pawi an tih thu an sawi. Germany pawhin ram pawn lama zin phalsak a ni lo chu pawi a tih thu a sawi bawk. Britain Foreign Secretary Boris Johnson chuan China-in Liu Xiaobo-a zinchhuah a phalsak lo chu a tisual niin a sawi ve bawk.

Mahse China medical expert-te chuan Liu hi zinchhuak turin a chak tawk lo niin an sawi a, amah endiktu khawthlang lam doctor-te chuan hei hi an pawmpui lo thung.