Brazil President hluiin inthlan chuh tho a tum

Brazil President hlui Luiz Inacio Lula da Silva chuan eiruk thubuaiah thiam loh chantir ni mah se, kum 2018-a president thlanna neih turah chuh a la tum tho tih a sawi.

Nilaini khan court chuan President hlui hi thamna, US dollar maktaduai 1.1 hu dawngah puhin thiam loh a chantir a, kum kua leh a chanve tang turin a hrem a, hei bakah hian kum 19 chhung politics khel thei lo turin a hrem bawk. Mahse Lula chuan thiam loh chantir a nihna hi court sang zawkah khin let a tum a ni. Court-in a hremna tur a tihchhuah hnua press conference a neihah, Lula chuan amah an puhna finfiahna tur chu engmah a awm lo niin a sawi a, thil tihsual a neih loh thu a sawi bawk.

Kum 2003-2010 chhunga Brazil president dinhmun chelhtu, Lula hi a term hnihna a hman zawh thlengin duhtu mipui an la tam hle a, term hnihna a hman zawh dawn hian mipui ngaihdan lakah president tura duhtu 80% zet an la tling a ni. Court hremna tihchhuahah kum 19 chhung politics khelh khapsak ni mah se, court sang zawka a appeal-na hnawl a nih chauhin he hremna hi hman theih a ni ang.